زياد .. اسمك الفلسطيني ب(ترمسعيا ) جبل - موفق مطر

لروح الشهيد العاشق زياد ابو عين ( ابو طارق) لروح الفدائي الذي ظلت القدس الحرة المستقلة الهامه ، وآياته التي يبشر بقداستها للحرية .

 لروح المناضل عضو المجلس الثوري لحركة التحرير الوطني الفلسطيني ، الذي كت الغبار ومسح العفن عن معنى ( الوزير ) في سلطة الشعب الفلسطيني الوطنية  لروح الفلسطيني المتواضع بسلوكه واخلاقيته ، لضحكته ، لصلابته لعنفوانه لأفكاره اللامعة العظيمة ، المتمردة المنطلقة بثبات نحو افقها الواقعي  .

اليك أخي الذي ىمنت أن الشعب الذي يحمل الرشاش ستحمل اجياله من بعده المنجل ..اليك يانجما في السماء تهدي من في الارض الى درب النضال من اجل الحرية والسلام :

سلام  يا زياد

خبّرنا بعد ما حَرَقت الصواعد والنوازل

خبرنا .. يا ابو طارق

كيف شايف الوطن من السما

 بعد ما رَسَمت بغرسة الزيتون دويرة للزمان

 خبرنا كيف الختيار ابو عمار

كيف الخليل ابو جهاد

كيف الصلاح ابو اياد

والكمالين

كيف الحكيم والرفاق

خبرنا يا زياد

انهم مشتاقين لنصر فلسطيني

مرسوم بعيون صبية

ضفايرها متل شروش السنديان

عشقت الارض ... والأرض عشقتها

صلت للسما...والسما حبتها

صبيتنا يا زياد عينيها بلون الزعتر

بماء الورد معطرة

بالصليب والهلال مشنشلة

تغني للدني نشيد الفدائي

تيسمع العالم صدى السلام

احنا راح نخبرك اليوم يا زياد

انو زيتونتك المباركة

اللي  اصلها بهالأرض

 وفرعها بالسماء ..عما تضوي .. مش بس تكاد

عما تضوي .. دون ما يمس زيتها نار

عما تنور دروب الصبايا والشباب ...

صبايا وشباب ..اللي بيمينهم حجر وبيسارهم كتاب

ماشيين عدروب الحرية

احرار راح يوصلوا اكيد

الصبح قرب

بهمتهم يا زياد

بهمتهم يا زياد وهاماتكم ياشهدا

راح يرفعوا مع المحمود ابو مازن للوطن تيجان

ابو طارق اسمك الفلسطيني بترمسعيا صار جبل

لاجرافة محتل بتشيلو

ولا حتى لو كان زلزال

ابو طارق اطمن

انت هناك ... روحك هون

سلام يا اخي

احنا وانت للأبد هون باقيين .. بهالوطن

هن الغزاة ..اللي متل ما اجو غربا راح يرحلوا

ميلاد مجيد يازياد

اسمك صخر

اسمك جبل

اسمك بكل حبة تراب

ذاكرتها دهب لماع ما بتعرف النسيان

اسمك على كل ورقة

من كل غصن زيتون

اسمك شهيد

اسمك وزير

اسمك بطل .