"الراتب أيدول"- عكرمة ثابت

كلكم او جزء كبير منكم تابع او سمع برنامج " العرب ايدول" والذي يعني ببراءة " العربي المثالي " او " العربي المحبوب " ، علما ان كلمة " ايدول " بالانجليزية لها معاني أخرى ك" المعبود" او " الصنم " ، ولنبتعد عن الغوص في جدلية المعنى لبرنامج مثير وشهير حظي بمتابعة ومشاهدة الملايين من المشاهدين والمعجبين ، فأنا قطعيا لا أقصد هذا البرنامج وعنوان مقالي واضح وصريح ولو انه مقتبس بنصفه الثاني تماما كما هو الاقتباس بنصف الراتب لدى مئات الالاف من موظفي السلطة الفلسطينية وقطاعها المدني والأمني " الراتب ايدول" او بمعنى أدق وأوضح " الراتب المثالي ، الراتب المعبود " سموه ما شئتم !!!! .
اعرف ان نسبة كبيرة من زملائي وزميلاتي العاملين في القطاع الحكومي  وغيرهم ممن يعتاشون من مرتب الحكومة ينتظرون على احر من الجمر إنتظام صرف رواتبهم – وانا بالتاكيد مثلهم – لكننا جميعا ونتيجة للوضع " غير المثالي " الذي نعيشه وبسبب " الإحتلال أولا " وإنسداد " الأفق السياسي ثانيا " نتعرض لسياسة ابتزاز ولي ذراع إن لم تكن "دولية " فهي " إقليمية"  وإن لم تكن إقليمية فهي بلا أدنى شك " إسرائيلية إحتلالية إستيطانية " بإمتياز !!!!
هذا قدرنا وما بدنا حدا يتفلسف ويقعد يزاود علينا " راتب بدناش و"بنص راتب ببتزوناش " هيك بالمشربح والعامية ودشرونا من الهبل والعباطه " إحنا عنا كرامه " بنعيش عالزيت والزعتر ونموت واقفين ولا نركع !!! هيك إحنا بدون لف ولا دوران اللي بعجبه أهلا وسهلا واللي مش عاجبه " يشرب من بحر غزة " !!!
هيك إحنا " بدنا دولة وهوية " وبدنا " نعيش بحرية " ببساطه بدناش احتلال وبدناش استيطان وبدناش حاجز عسكري اسرائيلي يسأل أي واحد فينا عن الهوية !!!
بدناش حصار وإعتقال وإغتيال وإبعاد !!!
بدناش قهر وظلم وعنصرية . وزي ما أجدودنا قالوا وابوتنا بعدهم شالوا : بدنا نتحرر بدنا نشعر إنا بشر النا حقوق وأطفالنا من حقهم بعيشوا مثل بقية اطفال العالم بدون رعب وحرمان وخوف !!!
يا عالم ياللي بتدعي الديمقراطية وين الذنب انو الفلسطيني بدو دوله وهوية ؟؟؟!!! يا عالم ياللي بتدعي العدالة وين الذنب أنو الفلسطيني يرفض المذلة والإهانه ؟؟!!!!
يا عالم يا للي بتدعي الحرية وين الذنب انك تعترف بدولة فلسطين وتمنحها العضوية ؟؟؟!!!!!!!!!!!!!!!!!!!!
يا جماعة انا بذكر واحنا طلاب بالجامعة ويوم صار " مؤتمر مدريد للسلام عام 1991" كتب  ابن خالتي " ابو السيع " اغنية عن السلام كان مطلعها ( يا سلملم يا سلام negotiation مع انكل سام delegation منا وفينا وقصفة زيتون وحمام ) ، أغنية كثير حلوة وحملت معاني كثير كبيرة ، وشو رايكم من يومها لليوم ما طلعت عملية السلام عن أي حرف وكلمة وردت بها الاغنية !!!! ايش هذا بعني ؟؟؟ فهموني ايش يعني 18 سنه وإحنا نحاور ونفاوض ولا حياة لمن تنادي ولا "حياة بالمفاوضات " ؟؟؟!!!!!!!!!!!!!!!!
أنا اللي قاهرني انهم بفكرونا " عبيد راتب " أو انو احنا كثير مدهلقين على " حكم ذاتي وإداري " ولا هدول اللي بصولو وبجولو قال بدهم حل " دولة وحده " او " حل إقتصادي " لا يا عالم لا بشر إحنا ما ناضلنا وضحينا عشان " نصاص حلول " ولا " عشان " نصاص رواتب " ، إحنا ناضلنا وضحينا عشان ما بدنا مستوطن يحتل اراضينا !!!
 إحنا ضحينا وناضلنا عشان نكون مثل بقية شعوب العالم النا علم ووطن وحدود وعنا مطار ودولة فيها سفرا ووزرا كثار ، بدنا نعيش بدون ما نشوف جنود وحواجز وزنازين ومقابر ارقام وقتل وحرق وقصف وحصار ، إحنا شعب خلف قيادتو سار عدرب الدولة والاستقلال والسيادة والإستقرار .أحنا شعب " أبو عمار " و" ابو مازن" و" الشقاقي " والياسين" ... إحنا شعب " الحكيم " وابو علي مصطفى " والقاسم " و" النجاب" ... إحنا شعب فلسطين صغار وكبار نرفض حكم " الظيم " وللصبر والصمود " أوسمة فخار " ما يكسرنا " راتب" ولا من " نص راتب " نتراجع وننهار ... إحنا شعب " الجبارين " جبل ما تهزو ريح ولا نص راتب قبيح ... شعب صامد صابر وين ما راح ، وهيك علمنا "محمود عباس" وربانا  " الختيار " .